Union Patriótiko Boneriano (UPB) a selebrá djabierne 23 di òktober su 57 aniversario di eksistensia. Den un ambiente ameno i di unión, miembro, simpatisante i sostenedónan di e partido a reuní pa konmemorá e fecha spesial i reflehá riba e trayektoria históriko di e organisashon polítiko.

Durante e selebrashon, UPB a mantené su tradishon di duna atenshon na e dimenshon spiritual. Un pastor tabata presente pa guia e anochi ku un mensahe i orashon. E momentu a sirbi tambe pa reflehá riba fundeshi, balornan i prinsipionan ku durante 57 aña a forma parti di e identidat di partido.

Advertisement

Despues di e palabranan di presidente di partido, líder saliente i líder interino, e programa a sigui ku un konsepto interaktivo bou di e nòmber "Open Mic Night".

Durante e segmento aki, tur esnan presente tabatin oportunidat pa tuma palabra, ekspresá nan opinion, kompartí eksperensia i presentá idea. Segun e partido, e konsepto a resulta un éksito, ku tantu representante di e baluartanan di UPB komo miembro di e generashon mas hóben a hasi uso di e oportunidat.

Presidente vitalisio di UPB, Rudy Ellis, no por a asistí físikamente na e selebrashon pa motibu di salú. Sinembargo, el a manda su diskulpa por eskrito i a kompartí su palabranan i aporte, kontribuyendo asina na e momento di konmemorashon.

UPB mira padilanti pa futuro di Boneiru

E aniversario no tabata solamente un momento pa selebrá 57 aña di eksistensia, sino tambe un oportunidat pa reflehá riba desaroyo di Boneiru i reto ku e isla ta enfrentando awe.

Segun UPB, durante su trayektoria e partido a hunga un ròl den kambionan importante pa adelanto di Boneiru. E organisashon ta indiká ku e gritu di pueblo pa un mihó organisashon i guia di Boneiru ta hasi e momento aktual un oportunidat pa e partido mustra su liderasgo i kompromiso ku futuro di Boneiru.

Durante e selebrashon, UPB a enfatisá e nesesidat di sosten pa por realisá su ambishon di guia Boneiru den un mihó direkshon. Sinembargo, e partido ta rekonosé ku ta e pueblo mes ta determiná, mediante nan voto, ken ta haña e oportunidat pa guia i organisá Boneiru.