Durante e reunion di Konseho Insular riba djaweps 2 di aprel 2026, tres diputado nobo a huramentá ofisialmente, markando un paso importante pa stabilidat den gobernashon lokal. Sra. Jennifer Mohamedjoenoes pa frakshon UPB, sr. Joselito Statia pa frakshon MPB i sr. Timoteo Silberie pa frakshon Serberie a tuma nan puesto komo miembro nobo di Kolegio Ehekutivo.

Ku e huramentashon aki, Kolegio Ehekutivo di Boneiru ta kompletamente formá despues di un periodo tenso ku kambionan polítiko riba nos isla. E evento a tuma lugá den presensia di famia, amigunan i otro invitadonan, loke a duna un karakter mas sòlèm na e momento.

Durante nan promé palabranan komo diputado, e tres mandatario nobo a ekspresá nan gratitut pa e konfiansa duná na nan i a mustra determinashon pa traha den interes di komunidat. Nan a enfatisá importansia di kolaborashon, transparensia i kontinuidat den gobernashon.

Konseho Insular tambe a duna un mensahe di sosten i apresio, deseando e diputadonan hopi éksito den nan periodo di mandato. 

E siguiente paso ta e repartishon di karteranan entre e miembronan di e Kolegio Ehekutivo. Esaki lo wòrdu determiná durante un reunion ku lo tuma lugá denter di poko tempu, unda lo definí klara mente ken lo keda responsabel pa kua área di gobernashon. Esaki lo kontribuí na mas klaridat i efisiensia den e maneho di asuntunan públiko na Boneiru.

Ku e desaroyo aki, Boneiru ta drenta un fase nobo den su gobernashon, ku enfoke riba stabilidat i progreso pa tur su habitantenan.

Advertisement