Tourism Business Academy ta lansa un inisiativa nobo i ta bini ku meta pa fortalesé emprendimentu den sektor di turismo riba Boneiru. E programa ta dirigí tantu na personanan ku ke kuminsá nan propio negoshi komo na empresanan eksistente ku tin ambishon di sigui krese i desaroyá nan aktividatnan.

E Tourism Business Academy ta ofresé un plataforma pa siña i guia, kaminda partisipantenan por haña konosementu práktiko riba maneho di negoshi, marketing, servisio na kliente i otro abilidatnan esensial pa logra éksito den sektor di turismo. Tambe ta pone énfasis riba inovashon i sostenibilidat, pa asina kontribuí na un desaroyo duradero di turismo riba nos isla.

Segun Charissa Abdul, operations assistant di BONHATA, e inisiativa akí ta bini na un momento importante pa sektor. Mas aleu Charissa a  indiká ku tin hopi oportunidat pa emprendimentu den turismo, pero ku tambe ta importante pa empresarionan tin e guia i instrumento adekuá pa por desaroyá nan negoshi di un manera profeshonal.

E programa tin un durashon di 7 siman, kaminda partisipantenan lo pasa den diferente fase pa pos siña i desaroyá nan idea di negoshi. Na final di e trayekto, partisipantenan lo tin oportunidat pa presentá nan idea òf produkto, ku un chèns pa gana un premio di $10.000 pa yuda ku lansamentu òf sostenementu di nan negoshi.

E programa ta enfoká riba fortifikashon di kapasidat lokal, ku meta pa stimulá mas partisipashon di komunidat den sektor turístiko. Ku esaki, Tourism Business Academy ke kontribuí na un ekonomia mas diversifiká i fuerte riba Boneiru.

BONHATA ta spera ku e programa aki lo generá oportunidat nobo pa empresarionan lokal i lo yuda empresanan eksistente pa mehorá nan kompetensia den un merkado ku ta bira kada bes mas kompetitivo.

Advertisement