Despues di vários dia na Santo Domingo i su presentashon na e festival Calle 8 na Miami, artista lokal Semii Marten ta release un kansion nobo titulá “Hal’e” ku ta bini kompañá ku su video clip.

“Hal’e” ta komponé pa Semii mes, miéntras e beat a wòrdu produsí pa Wallaskii. Sierto Instrumentonan grabá pa Robert Felida, i live drums a wòrdu grabá na Dash Music Studio na Hulanda.

Riba 15 di mart, Semii a logra un milestone importante den su karera ora ku e a subi riba e esenario di Univision durante Calle 8, konsiderá komo un di e festival latino di mas grandi den mundo. Promé ku esaki, ela a pasa pa Santo Domingo kaminda e a hasi un gira intensivo di media, ku presentashonnan na plataforma manera Alofoke Media Group, Bebeto TV i Radio Television Nacional.

Despues di su presentashon na Miami, Semii a sigui ku mas aparishon den media grandi manera Univision i Telemundo, kaminda e a promové su muzik i a introdusí su mes na un públiko mas amplio.

“Hal’e” ta e promé kansion di e aña na Papiamentu, maske Semii ta trahando riba proyektonan den e merkado latino. E video clip di e kansion ta mustra diferente lugá ikóniko di Boneiru manera Lac Bay, Sorobon i atmosfera di Regatta, ku ta duna e kansion un vibra karibeño dushi i outéntiko.

Ku e release akí, Semii ta sigui mustra su kresementu komo artista den e industria musikal.

Advertisement