Selekshon Nashonal di Boneiru ta preparando pa un otro reto internashonal importante. Dia 6 di yüni próksimo, selekshondi futbòl Boneriano lo hunga un wega amistoso kontra British Virgin Islands na Malaga, Spaña, komo parti di preparashon pa Concacaf Nations League 2026.

Esaki lo bira e di dos biaha den historia ku Boneiru ta hunga un partido ofisial na Europa. E promé biaha tabata na yüni di 2024, ora ku Boneiru a enfrentá Sint Maarten na Hulanda.

Ku e partido na Spaña aki, Boneiru ta sigui amplia su eksperensia internashonal. Te awor, e selekshon ya a hunga na 16 diferente pais i teritorio ku ta forma parti di e region di CONCACAF i mas ayá. Entre esaki nan tin Kòrsou, Merka, Hulanda, El Salvador, Marroko i awor tambe Spaña.

Federashon di Futbòl Boneriano (FFB) a indiká ku entrenadó prinsipal Rilove Janga lo anunsiá e selekshon final di hungadónan den e dianan benidero.

Aña 2026 lo por bira un aña históriko pa futbòl boneriano pa motibu ku si tur e partidonan programá keda hungá segun e kalendario, Boneiru lo yega un total di nuebe wega den un solo aña kalendario, loke lo representá un rèkórt nobo pa nos selekshon. E rèkórt aktual ta ocho wega, establesí den aña 2024.

Despues di dos partidonan ya hungá durante e FIFA break na mart, Boneiru tin programá seis enkuentro mas den Concacaf Nations League durante e periodo di FIFA break na sèptèmber, òktober i novèmber.

Último be ku Boneiru i British Virgin Islands a enfrentá otro tabata na 13 di òktober 2019 di kua Boneiru a sa di sali ku eviktoria 4-3. E dia ei golnan di Boneiru a keda anota pa Ayrton Cicilia (25' Pen), Rilove Janga (88'), Charles Medway (90+3' autogol) i Jurvan Koffy (90+5').

Advertisement