Representantenan di Movementu di Pueblo Boneriano (MPB) a tene un reunion informal ku representantenan di Partido Demokrátiko (DP) djaluna atardi. E reunion a tuma lugá riba invitashon di e lider di partido DP i tabata intenshoná pa sondea si MPB por hunga un ròl den kontinuashon di e gobièrnu aktual.

Segun lider di partido MPB Hennyson Thielman, e partido a indiká durante e reunion ku aktualmente e no ta mira oportunidat pa sostené e koalishon aktual. E ta sita, entre otro, e krítika públiko kontinuo riba e gobièrnu durante e último tres añanan.

Thielman ta deklará ku vários proseso atministrativo riba Boneiru a para ketu i ku, den su bista, e koalishon aktual no ta tumando sufisiente responsabilidat pa esaki. E ta señalá ku e situashon aki a kontribuí na e desishon di miembro di Konseho Insular Salma Serberie pa kita su sosten na e koalishon.

Regularmente MPB a kritiká e maneho di gobièrnu durante último añanan. Thielman ta mustra, entre otro, riba diskushonnan anterior ku lider di partido DP, Clark Abraham tokante kompra di tereno banda di Santa Clara, un asuntu ku ainda ta bou di investigashon.

Segun MPB, ta esensial pa Boneiru adoptá un rumbo atministrativo nobo riba término kòrtiku. Thielman ta enfatisá e nesesidat pa un gobièrnu stabil ku ta enfoká riba asuntunan urgente manera bibienda sosial, oumento di preis, prosesonan di pèrmit, kondishon di kamindanan, i problemanan rondó di lèntfel.

Advertisement