Kuerpo Polisial Hulanda Karibense (KPCN) a hasi inspekshonnan riba vehíkulonan i shofùrnan ku a partisipá na Marcha Hubenil na Rincon, djasabra atardi 7 di febrüari. E marcha a kuminsá alrededor di 3:20 di atardi i a finalisá alrededor di 6:08 di atardi.

Durante e kòntròlnan promé ku e marcha sali, polis a deskubrí ku un shofùr no tabata disponé di un reibeweis bálido i tampoko no por a presentá dokumentashon bálido di seguro. Pa motibu di esaki, mester a regla un otro shofùr pa sigui manehá e vehíkulo. Den un inspekshon separá, shofùr di un otro vehíkulo tampoko no por a mustra e dokumentonan di seguro nesesario.

Tur shofùr ku tabata parti di e marcha a wòrdu someté na un alcoholmeter, kual tur a pasa ku eksito. Polis a indiká ku reglanan di tráfiko ta wòrdu enforsá estriktamente pa garantisá siguridat di tur partisipante i bishitantenan durante aktividatnan di Karnaval.

Durante e marcha, polis a topa ku tres (3) menor di edat ku tabatin alkohòl den nan poder. Agentenan a papia ku e menornan i a duna òrdu pa tira e alkohòl afo.

Den e kuadro aki, Kuerpo Polisial ta atvertí doñonan di bar, minimarket, supermerkado i otro establesimentunan di horeka pa no bende alkohòl na menor di edat. Polis lo sigui kontrolá estriktamente den e dianan benidero i lo aktua ora no ta wòrdu kumplí ku e reglanan vigente.

Marcha Hubenil na Rincon a transkurí di forma ordená i sin ningun insidente grandi kaminda mester a aktua di parti di Kuerpo Polisial Hulanda Karibense.

Advertisement