Komo parti di e plan struktural pa mehorá infrastruktura riba Boneiru, e proyekto di mantenshon na Kaminda Lagun a keda finalisá ku éksito. E trabounan a konsentrá riba e sekshonnan di e kaminda ku tabatin e nesesidat mas urgente, kaminda tres partinan prinsipal a wòrdu atendé promé segun e prioridat tékniko determiná.

Durante e fase di ehekushon, a hasi diferente trabou di mantenshon pa mehorá e kondishon general di e kaminda, ku meta di oumentá siguridat pa tur usuario di tráfiko, inkluyendo vehíkulo motorisá, siklista i peaton. E proyekto ta forma parti di un programa kontinuo kaminda gobièrnu ta invertí di un manera dirigí den e kamindanan ku tin mas nesesidat di atenshon.

Tin indikashon ku e trabou na Kaminda Lagun no ta para aki. Den un siguiente trayekto lo kontinuá ku e otro partinan di e kaminda aki, kaminda lo evaluá kada sekshon segun su estado aktual. Riba base di esaki, lo implementá e medidanan di mantenshon ku ta mas adekuá pa garantisá un resultado duradero.

Direktor interino, Ligwino Leito, a pone énfasis riba importansia di e aserkamentu struktural akí. Segun señor Leito, dunando prioridat na e partinan ku ta den e estado mas krítiko ta permití pa logra resultadonan visibel riba korto plaso, miéntras ku na mes un momento ta traha sistemátikamente riba mehorashon a largu plaso. Na final señor Leito a agregá ku e meta final ta pa fortifiká kalidat i durabilidat di infrastruktura riba nos isla.

Direktorado di Planifikashon i Desaroyo a re afirmá su kompromiso pa sigui traha na mantenshon i modernisashon di e ret di kaminda riba Boneiru. Ku e esfuersonan akí, nan ta buska no solamente mehorá e kondishon di kamindanan, sino tambe kontribuí na un tráfiko mas sigur i efisiente pa komunidat.

Advertisement