Lider di frakshon di Progressive Labor Party (PLP) den Konseho Insular di Sint Eustatius, Clyde van Putten, a ekspresá su gran preokupashon tokante loke e ta yama un patrón kontinuo di trato inapropiá di mandatario Hulandes pa ku representantenan elekto di Sint Eustatius.

Van Putten a referí spesífikamente na bishita aktual di Eric van der Burg, sekretario di estado pa Relashonnan den Reino, kende ta den su promé bishita ofisial na Karibe Hulandes. Segun e konsehal, riba otro islanan den Reino, e sekretario di estado lo tin reunion ku parlamento i otro instansianan representativo, miéntras ku na Boneiru i Saba e ta reuni ku e konsehonan insular. Sin embargo, na Sint Eustatius, segun Van Putten, e reunion ta limitá solamente na Kolegio Ehekutivo, lagando Konseho Insular kompletamente afó.

Mas aleu, Van Putten a indika ku esaki no ta promé bia ku e tipo di situashon aki ta sosodé i a puntra públikamente kiko por ta e motibu tras di esaki. Segun e, ta parse ku bishitanan ofisial hopi biaha ta wordu planeá di manera ku solamente sierto hende i organisashon ta wordu invitá pa papia ku representante Hulandes, ku e meta pa presenta un imágen selektivo di realidat di e isla.

“Kontinuamente ta evitá hende ku lo papia kla i direkto tokante e problemanan real ku nos ta enfrentá,” Van Putten a deklará, rekordando ku Konseho Insular ta e organismo mas haltu elegì direktamente pa pueblo den un sistema demokrátiko, i pa esei mester wordu trata ku respet.

Den mesun konteksto, Van Putten a komentá riba e transferensia di Fort Oranje, ku lo tuma lugá riba 9 di aprel 2026, for di gobièrnu Hulandes pa gobièrnu di Sint Eustatius. El a bisa ku el ta risibí e desaroyo aki positivamente, ya ku esaki ta di akuerdo ku un moshon ku el mes a presentá na 2022 pa recuperá propiedatnan historiko di e isla.

Sin embargo, e konsehal a indiká ku e no lo asistí na e seremonia di entrega bisando: “Mi no lo tuma parti den ningun seshon di potret i seremonia simbóliko, mi pueblo di Sint Eustatius no a elegí mi pa esaki.”

Van Putten a konkluí ku si e sekretario di estado no ta dispuesto pa rekonosé i diskutí e problemanan serio ku ta eksistí na Sint Eustatius ku representante elegì pa publo, e no ta mira ningun motibu pa partisipá den loke el a deskribí komo un “fachada”.

Advertisement