Konosido artista, Dayron Coffie, a opta pa no keda ketu i a ekspresá su malkontentu profundo relashoná e premiashon di festival Kanto Krioyo 2026. Coffie ta kuestioná e lógika tras di e sumanan entregá, spesialmente mirando e éksito grandi di e evento ku a logra yena e lugá yen yen durante anochi final.

Pa Coffie, e kontrast entre entrada generá pa públiko i premio final pa artistanan ta inaseptabel. "Si un ganadó ta risibí apénas $500, bo no por ni imaginá bo kiko esnan ku a keda mas abou den e tabla di posishon a haña," e artista a duna di konosé. Segun Coffie, e suma aki no ta kubri ni un frakshon di e invershon ku un artista mester hasi den komposishon, areglo, bisti i ensayo pa por presentá un produkshon di kalidat riba tarima.

Aunke e ta hopi krítiko riba repartishon di ondonan dor di e organisashon mes, Coffie a mustra su apresio pa e spònsernan ku sí a demostrá kompromiso. El a gradisí públikamente tur e empresanan i personanan ku a duna "premio dirigí", lokual a yuda yena e bashí di e partisipantenan. Sin e yudansa direkto aki di spònsernan, e situashon lo tabata hopi mas grave pa músikonan.

Dayron Coffie a enfatisá ku su meta no ta pa destruí, sino pa trese mehorashon pa futuro. El a splika ku tin hopi hende den e mundu di farándula i kultura ku ta mes un mal kontentu kuné, pero ku pa un òf otro motibu no tin e kurashi di bin dilanti i papia.

E artista ta spera ku su punto di bista ta sirbi komo un base pa e organisashon sinta na mesa i re-evaluá premionan di un evento ku ta konta ku tantu sosten di pueblo. Pa Coffie, e rèspèt pa artista mester keda reflehá den un premiashon digno ku ta hustifiká e esfuerso i amor pa nos Kanto Krioyo.

Advertisement