Den un moveshon pa garantisá órden i siguridat, Direktorado di Supervishon i Mantenshon di Lei na Boneiru a ehekutá un seri di kòntròl dirigí riba esektor di horeka i trùk di pan durante luna di mart.

E akshonnan a enfoká prinsipalmente riba oranan di anochi i den wikènt, mirando ku outoridatnan a risibí señalnan ku hopi negoshi ta keda aktivo pafó di orario normal di operá. E ophetivo tabata pa verifiká si establesimentunan tin un pèrmit bálido, manera artíkulo 3 di Ordenansa di Bebida i Horeka di Boneiru ta eksigí.

Durante e kontrol a kontrolá 46 negoshi di kua 13 no tabatin nan asuntunan na òrdu. E fayonan mas komun ku a topa tabata:

• Falta di un pèrmit di eksplotashon bálido.
• Dokumentashon obligatorio ku no por a ser presentá na e momento ei.
• Negoshinan ku tabata operá na un sitio diferente òf ku aktividatnan ku no tabata outorisá den nan pèrmit.
• Inkumplimentu ku e kondishonnan spesífiko mará na e outorisashon.

Outoridatnan no a sinta man krusá i a tuma medida mesora kontra esnan den violashon. Den algun kaso esaki a hiba na e paro temporal di operashonnan di e negoshi. Tambe a hala atenshon di empresarionan i a duna nan instrukshon pa pone nan dokumentashon na òrdu mas pronto posibel.

Direktorado di Supervishon i Mantenshon di Lei a indiká ku e reglanan akí t'ei pa protehá siguridat, salú públiko, higiena i pa keda ku un imágen di kaya bon kuidá.

Direktorado di Supervishon ta hasi un yamada serio na tur doño di negoshi den e sektor di horeka i benta riba kaya pa nan revisá i prolongá nan pèrmitnan na tempu. E kòntròlnan aktivo lo kontinuá den e periodo benidero, i lo sigui aktua duru konforme lei pa asina garantisá un komunidat seif, hustu i salú na Boneiru.

Advertisement