Papiamentu
Trabounan na e sitio di stashoná outo na Kolegio Rayo di Solo a keda kla. E proyekto tabata enfoká riba organisashon di e fluho di tráfiko i oumento di siguridat pa e usuarionan di e skol, inkluyendo alumno, mayor i personal.
E proyekto a inisiá na final di aña 2025 bou di enkargo di Direktorado di Planifikashon i Desaroyo di Entidat Públiko Boneiru (OLB) i ehekutá pa Bonaire Infrastructuur. E kambio prinsipal ta e markashon di sitionan spesífiko pa stashoná outo i sitionan pa peaton.
Banda di e órden di tráfiko, e konstrukshon a inkluí un sistema di desague nobo. Meta di e adaptashon akí ta pa evitá e akumulashon di lodo i awa den e área despues di yobida, garantisando e aksesibilidat na e edifisio di skol bou di diferente kondishon di tempu.
Durante e ehekushon, a tuma na kuenta e opinion di e konseho di alumno di Kolegio Rayo di Solo. Nan puntonan di atenshon a keda integrá den e diseño final di e sitio. Relashoná ku nan partisipashon, e konseho di alumno a risibí un martin di presidente di parti di OLB pa usa den nan reunionnan komo representante di e grupo di alumno.
E proyekto akí ta parti di e plan general di Entidat Públiko Boneiru pa mehorá infrastruktura i siguridat den e zonanan rònt di skolnan na Boneiru.
Kargando komentarionan...