Gezaghèber ta rechasá alegashonnan di falta di transparensia

Gobernashon i Polítika

Gezaghèber ta rechasá alegashonnan di falta di transparensia

Pa AC 19 Mar, 2026 5 Min Lesa 12 Bishitante

Gezaghèber di Boneiru ta rechasá por medio di un komunikado di prensa, alegashonnan den medionan di komunikashon di no a aktua transparente den un investigashon tokante un "bouw stop" den konstrukshon, relashoná ku un miembro di famia di eks diputado Anjelica Cicilia. Segun gezaghèber, e insinuashonnan no ta korekto.

E kaso a kuminsá na mei 2025 ku un paro di konstrukshon. Pa evitá konflikto di interes, Kolegio Ehekutivo a laga hasi un investigashon independiente. Basá riba esei, un di dos investigashon a sigui pa determiná si e anterior diputado a influensia òf favoresé e proseso.

Riba 8 di desèmber 2025, resultado di e investigashon a wordu presentá na Konseho Insular, ku a hasi e informashon públiko. Pueblo tambe a wordu informá via un komunikado di prensa, i despues e resultado a wordu kompartí ku prensa pa publisidat.

Gezaghèber ta lamentá e manera ku e kaso a wòrdu presentá den medionan, i ta insistí ku nunka tabatin intento pa tene informashon atras. El a reafirmá su kompromiso ku Boneiru i indiká ku transparensia tin un balor importante den nos demokrasia.

Resultado di Investigashon:

9b.-Def-251121_fc_olb_v1.0_Redacted_compressed_Redacted.pdf 1.44 MB

Na desember 2025, Forensic Caribbean a finalisá e investigashon tokante ortrogamentu di pèrmit di konstrukshon na tata di eks diputado Anjelica Cecilia. E investigashon a identifiká falta den prosedimentu, manera dokumentashon inkompletu, verifikashon insufisiente di propiedat i diferensia entre plan i kadastró.

Importante den e investigashon tabata ku no tabatin indikashon di influensia direkto di eks-diputado Anjelica Cicilia. E resultadonan ta mustra ku e petishon a wòrdu presentá 7 di novèmber 2024 i ku a prosesá esaki formalmente den 16 siman, inkluyendo pago di gastunan, diskushon den e komishon, i aprobashon.

E investigashon ta revelá ku e plan di tereno i petishon no tabata korespondé ku e realidat kadastral i tambe a usa un number di tereno diferente. Tambe un parti di e plan di konstrukshon, inkluyendo un pisina, tabata situá riba tereno ku ahinda tabata propiedat di Entidat Públiko Boneiru i ku no a wòrdu transferí ahinda.

E proseso pa otrogá di pèrmit tabata karakterisá pa evaluashon apart, kaminda kada departamentu a revisá su propio komponente. Kordinashon verbal i desishon informal tabata predominá, i tabata falta dokumentashon nesesario. Propiedat di tereno no a wòrdu verifiká sistemátikamente, loke a resulta den e pèrmit formalmente otorgá, un parti di e plan tabata situá riba tereno ku no a wòrdu transferí. Apesar di e faltanan, e rapòrt ta señalá ku no tabatin indikashon di preshon òf influensia direkto di eks diputado Cicilia.

E rapòrt ta konkluí ku, aunke e proseso formal a tuma luga manera mester ta, e proseso tabata defekto debí na dokumentonan inkompleto, kòntròl inadekuá i verifikashon insufisiente di propiedat di tereno. Sinembargo, e paro di konstrukshon i korekshonnan ku a sigi ta demostrá ku supervishon, enforsamentu i ku kontrol interno ta funshoná.