15 but durante kòntròl di tráfiko

Orden Públiko i Seguridat

15 but durante kòntròl di tráfiko

Pa AC 23 Jun, 2026 5 Min Lesa 123 Bishitante

Kuerpo Polisial Hulandes Karibense (KPCN), den koperashon ku diferente partner, a realisá varios kòntròl planiá di tráfiko riba djabièrnè 19 di yüni na diferente lugá na Boneiru. Durante e operashonnan, a duna un total di 15 but pa diferente violashon di lei di tráfiko.

Den oranan di mainta, polis a tene un kòntròl na Kaya Internashonal kaminda a para i kontrolá 18 vehíkulo. Durante e akshon aki, a duna seis but pa violashon manera manehá sin reibeweis bálido, sin seguro bálido, transporte di karga no tapá i manehá sin plachi di number patras.

Mas lat den dia, un otro kòntròl a tuma lugá na Kaya Barakuda. Durante e inspekshon, un shofùr a keda di but pa manehá sin reibeweis.

Atardi, KPCN a uni forsa ku Koninklijke Marechaussee (KMar) i Douane pa un operashon mas amplio riba Kaya Internashonal i Kaya Amsterdam. E kòntròl tabatin komo meta pa mehorá seguridat den tráfiko i kontrolá riba posibel transporte di artíkulonan prohibí. Tambe a hasi kòntròl di velosidat ku uso di un lasergun.

Durante e último kòntròl aki, a duna shete but, inkluyendo tres pa surpasá e límite di velosidat di 40 kilometer pa ora, dos pa manehá sin seguro bálido, un pa manehá sin reibeweis bálido i un pa falta di plachi di number dilanti.